khayal tha ki guman ko yaqin bana dunga
aur ab ye khwab likhunga bhi to mita dunga

mujhe bhi sath hi le lo magar nahin yaro
main sust-rau hun tumhaari thakan badha dunga

hawa-e-shab mere shoale se intiqam na le
ki main bujha to ufuq tak dhowen uda dunga

bade shabab se aaega sail-e-rang ab ke
phir is mein main bhi to ek ju-e-khun mila dunga

chalo khamosh hua main ab is sukut ke baad
na shab ko tul na ham-sae ko sada dunga