khizan ki aazmaish ho gaya hun
main ek jangal ki chahat mein hara hun

meri kashti kabhi gharqab ki thi
abhi tak main samundar se khafa hun

parinde ho gae naraaz mujh se
kaha jab main bhi udna chahta hun

koi wahshat se bhi milwae mujh ko
main sahra mein abhi bilkul naya hun

abhi ek raushni aai thi milne
sabab kya hai ki main bujhne laga hun

yahan ke ped sare dam-ba-khud hain
ghazab hai main hi kata ja raha hun

koi pani mein kab tak rah sakega
main ashkon se to aankhon tak bhara hun