khizan ki zad mein gul-e-tar hai kya kiya jae
yahi chaman ka muqaddar hai kya kiya jae

dil-o-nigah ko jis se sukun mayassar tha
lahu lahu wahi manzar hai kya kiya jae

buland-o-past ka har imtiyaz be-mani
ajib waqt ka tewar hai kya kiya jae

khuda ka shukr hai jis haal mein guzar jae
ek intishaar to ghar ghar hai kya kiya jae

zaban se phul baraste hain guftugu aisi
aur aastinon mein khanjar hai kya kiya jae

jo apni zat ki tarikiyon mein gum hai abhi
wo subh-e-nau ka payambar hai kya kiya jae

kahan talak koi parkhe ki ab ba-surat-e-khair
qadam qadam pe ajab shar hai kya kiya jae

kahan ka jazba-e-hubb-e-watan kahan ka khulus
bas eqtidar ka chakkar hai kya kiya jae

qadam qadam pe hai ghaugha-e-bartari ka junun
har ek ek se badh kar hai kya kiya jae

jo gul-ba-dast the 'fakhir' kabhi hamare liye
unhin ke hath mein patthar hai kya kiya jae