kho kar teri gali mein dil-e-be-khabar ko main
fikr-e-khudi se chhut gaya umr bhar ko main

sazish ba-qadr-e-rabt thi tur o jamal mein
samjha hun aaj uqda-e-sang-e-sharar ko main

ab hai to mustaqil ho farogh-e-shab-e-visal
aisa na ho charagh jalaun sahar ko main

sahra se bar bar watan kaun jaega
kyun ai junun yahin na utha laun ghar ko main

jhuma kya surur se 'simab' raat bhar
dekha kiya kisi ki nashili nazar ko main