sab aasan hua jata hai
mushkil waqt to ab aaya hai

jis din se wo juda hua hai
main ne jism nahin pahna hai

koi darad nahin hai shab mein
phir ye ujala sa kaisa hai

barson ka bachhda hua saya
ab aahat le kar lauta hai

apne aap se darne wala
kis pe bharosa kar sakta hai

ek mahaz pe haare hain hum
ye rishta kya kam rishta hai

qurb ka lamha to yaron ko
chup karne mein guzar jata hai

suraj se sharten rakhta hun
ghar mein charagh nahin jalta hai

dukh ki baat to ye hai 'shaariq'
us ka wahm bhi sach nikla hai