kho ke dekha tha pa ke dekh liya
har tarah dil dikha ke dekh liya

phir khule ibtida-e-ishq ke bab
us ne phir muskura ke dekh liya

yaad kuchh bhi raha na us ke siwa
hum ne us ko bhula ke dekh liya

zindagi ne khushi ke dhoke mein
rabt gham se badha ke dekh liya

aise bichhde ki phir mile na kabhi
khub daman chhuda ke dekh liya

khwab mubham khayal be-mani
ranj-e-duri utha ke dekh liya

kitne bite dinon ka gham tha 'sahar'
aaj jis ne rula ke dekh liya