khud ko kitna chhota karna padta hai
bete se samjhauta karna padta hai

jab auladen nalaeq ho jati hain
apne upar ghussa karna padta hai

sachchai ko apnana aasan nahin
duniya bhar se jhagda karna padta hai

jab sare ke sare hi be-parda hon
aise mein khud parda karna padta hai

pyason ki basti mein shoale bhadka kar
phir pani ko mahnga karna padta hai

hans kar apne chehre ki har silwat par
shishe ko sharminda karna padta hai