khud pe wo fakhr-kunan kaisa hai
us ko apne pe guman kaisa hai

koi jumbish hai na aahat na sada
ye jahan-e-guzaran kaisa hai

dil dhadakne ki bhi aawaz nahin
saneha kahish-e-jaan kaisa hai

aaj tak zakhm hare hain dil ke
marham-e-chaara-garan kaisa hai

us se nazdik nahin hai koi
wo qarib-e-rag-e-jaan kaisa hai

gul khula hi gai laila-e-bahaar
shor-e-ashufta-saran kaisa hai

hum kadi dhup ke aadi the 'habab'
sar pe ye abr-e-rawan kaisa hai