khudi mein dub ke khud se kabhi mile ho kya
hujum-e-yaran mein tanha kabhi hue ho kya

na jaane kis liye duniya ka rona rote ho
mizaj us ke nahin jaante nae ho kya

khatra bhatakne ka rahta hai jis rawish pe bahut
tum us rawish pe kabhi dur tak gae ho kya

wo jis pe mujh ko shikayat nahin rahi tum se
us ek baat pe mujh se khafa hue ho kya

yahi saliqa hai yaron kisi pe marne ka
kabhi kisi ke liye zindagi jiye ho kya

junun-e-ishq ki parwaz mein ye kis ka khauf
bulandiyon ke taqazon se dar gae ho kya