mere dil se mohabbat ki farawani nahin jati
main aksar sochta hun kyon ye nadani nahin jati

ye haalat ho gai hai shiddat-e-khatraat-e-paiham se
ki achchhe aadmi ki shakl pahchani nahin jati

gharon ki raunaqen kilkariyan bachchon ki hoti hain
khilaunon ko saja kar ghar ki virani nahin jati

na rasm-o-rah hai un se na baqi wasta koi
magar palken jo karti hain nigahbani nahin jati

buzurgon se suna hai man ke qadmon mein hi jannat hai
ki khali barkaton se man ki qurbani nahin jati