khule jo hum to badhe hum mein fasle kitne
ba-ja-e-shukr karam lab pe the gile kitne

kabhi salib kabhi zahr aur kabhi khanjar
sabaat-e-ishq mile hain tujhe mile kitne

koi gulu pe koi hath jeb-o-dastan par
rahe hain chaaragaron se muqable kitne

visal-o-hijr to do lafz hain mohabbat mein
talluqat mein hain aur silsile kitne

hui hai ishq mein tashhir chaak-daman ki
ye dekhiye to ki chaak-e-jigar sile kitne