khulega uqda-e-tauhid meri baat ke sath
sifat bhi rahti hai har waqt apni zat ke sath

kahin pe bikhri hai tanhai mere kamre mein
kahin pe bikhri hain taswiren kaghzat ke sath

main us se haar ke har pal duaen mangta hun
ki us ki jit bhi ho jae meri mat ke sath

wo kal jo lathi ko ek azhdaha banata tha
wo moajiza kahin gum hai ajaibaat ke sath

ye sara padhna padhana hai pet ka chakkar
ki ahl-e-ilm bhi bikte hain parchat ke sath

kahin pe din ke charche hain kufr se 'waqif'
kahin pe kufr ke charche hain diniyat ke sath