khulus ho to dua mein asar bhi aata hai
shajar hara ho to us mein samar bhi aata hai

meri samaat o binai chhinne wale
main sun bhi sakta hun mujh ko nazar bhi aata hai

tumhein charagh bujhane ka zoam hai lekin
hamein tulu-e-sahar ka hunar bhi aata hai

kalisa o haram o dair mohtaram lekin
inhin ki zad mein kahin mera ghar bhi aata hai

falak-nashin sahi mera khuda magar 'mohsin'
kabhi kabhi wo zamin par utar bhi aata hai