khumar-e-shab mein zamin ka chehra nikhar raha tha
koi sitaron ki palki mein utar raha tha

naha rahe the shajar kisi jhil ke kinare
falak ke takhte pe chand baitha sanwar raha tha

hawaen diwar-o-dar ke pichhe se jhankti thin
dhuan lapete koi gali se guzar raha tha

khada tha meri gali se bahar jahan sara
main khwab mein apne aap se baat kar raha tha

hawa ka jhonka udas kar ke chala gaya hai
abhi abhi to main jam-e-ghaflat ko bhar raha tha

aur ab thahar ja 'nawed' aage to kuchh nahin hai
tu umr bhar is khayal se be-khabar raha tha