khun aankhon se nikalta hi raha
karwan-e-ashk chalta hi raha

is kaf-e-pa par tere rang-e-hina
jin ne dekha hath malta hi raha

subh hote bujh gae sare charagh
dagh-e-dil ta sham jalta hi raha

kab hua bekar putla khak ka
ye to sau qalib mein dhalta hi raha

beh hue kab dagh mere jism ke
ye shajar har waqt phalta hi raha

kab thama aankhon se meri khun-e-dil
josh kha kha kar ubalta hi raha

kya hua marham lagane se 'fughan'
zakhm-e-dil sine mein salta hi raha