khun-e-dil hota raha khun-e-jigar hota raha
ye tamasha ishq mein sham-o-sahar hota raha

is jahan-e-ab-o-gil mein yun basar hoti rahi
muskuraate bhi rahe daman bhi tar hota raha

aarzuon ko tadap kar nind si aati gai
qissa-e-bimar-e-gham yun mukhtasar hota raha

in ki baaton par yaqin hum umar bhar karte rahe
intizar-e-sham-e-wada umr bhar hota raha

talkhi-e-gham se na pal bhar ke liye fursat mili
umr bhar go chaara-e-dard-e-jigar hota raha