khun-e-dil ka jo kuchh ashkon se pata milta hai
hum ko ji khol ke rone ka maza milta hai

hum se is ishq-e-majazi ki haqiqat puchho
ke ye but jab nahin milte to khuda milta hai

shauq se kar mujhe pamal magar ye to bata
khak mein milne se mere tujhe kya milta hai

aaj tak hum ko to wo but na mila par na mila
kahte hain dhundne wale ko khuda milta hai

kund khanjar ki shikayat main karun kyun 'natiq'
sach to ye hai ke mujhe yun hi maza milta hai