khun roti hui aqwam ka dukh
kha na jae kahin hangam ka dukh

chand lafzon mein kahan aaega
waqt-e-rafta tere ayyam ka dukh

hum ne furqat ki siyah raaton mein
odh rakkha tha tere nam ka dukh

tum ne ban-bas kahan kata hai
tum na samjhoge kabhi ram ka dukh

tum jo ho shahr-e-tarab ke basi
tum bataoge hamein sham ka dukh

is mein gharqab hue to yaron
hum ne jaana hai bahut kaam ka dukh