khunin gulab sabz sanobar hai samne
aankhon mein qaid karne ka manzar hai samne

fauj-e-siyah chaaron taraf mahw-e-gasht hai
khanjar barahna raat ka lashkar hai samne

wo sans le raha hai magar zindagi kahan
shishe mein band lakh ka paikar hai samne

itra ke chal shuur ki thokar bhi kha ke dekh
be-lams aagahi ka wo patthar hai samne

fitrat pe ye bhi tanz hai shayad 'shakeb-ayaz'
pyasi hai ret aur samundar hai samne