laga liya tha gale us ne ba-wafa kah kar
hamin ne tal diya harf-e-ashna kah kar

kaf-e-talab pe kabhi to mere huzur likho
hina ke naqsh ko tahrir-e-khun-baha kah kar

kuchh aisi shakl mujhe ru-ba-ru dikhai di
nazar palat gai aaina-e-riya kah kar

uda ke le gai mauj-e-saba na jaane kahan
tumhaare jism ki khushbu ko aashna kah kar

fasil-e-waqt se aazad ho ke meri zaban
qubul-e-am hui dasht ki sada kah kar

thin jin mein dafn hazaron qadam ki aawazen
mita diya tere talwe ne naqsh-e-pa kah kar

main apni waza pe qaem rahun 'shakeb'-ayaz
wo apni pyas bujhae bura-bhala kah kar