khushbu ka jism yaad ka paikar nahin mila
dil jis se ho shagufta wo manzar nahin mila

aakhir bujhata kaise wo apni lahu ki pyas
talwar mil gai to koi sar nahin mila

nagah doston ki taraf uth gai nigah
jab dushmanon ke hath mein khanjar nahin mila

phirta hun kab se naqd-e-dil-o-jaan liye hue
main wo sakhi hun jis ko gadagar nahin mila

'tahir' mitega kaise ye be-chehragi ka gham
wo sang hun jise koi aazar nahin mila