khushbuon se meri har sans ko bhar deta hai
mausam-e-gul tere aane ki khabar deta hai

mujh se milta hai magar tez hawaon ki tarah
har qadam par mujhe jo shauq-e-safar deta hai

bhar gai hai mere daman ko nadi ki ek mauj
log kahte hain samundar hi guhar deta hai

khamushi mohr laga deti hai honton pe mere
is tarah bhi wo rafaqat ka samar deta hai

aur bhi umr badha deta hai meri 'shabnam'
mera suraj mujhe jab sail-e-sharar deta hai