kisi ki muntazir ab dil ki rah-guzar nahin
magar mujhe to kisi tarah bhi qarar nahin

gulab kaise khile dasht-e-arzu mein koi
ye sar-zamin abhi waqif-e-bahaar nahin

simat gaya tha mere bazuon mein raat gae
ye aasman meri tarah be-kanar nahin

teri nazar ne khilae meri nazar mein gulab
khud apne aap pe mausam ko ikhtiyar nahin

lahuluhan meri ungliyan ye kahti thin
kisi chatan mein ab koi aabshaar nahin