khushiyon ko dhundne jo kabhi hum nikal pade
gham jitne aas-pas the sab sath chal pade

ek sard aah ne meri aisa asar kiya
us but ke dil mein rahm ke chashme ubal pade

sikka tha bazm-e-dahr mein jin ka kabhi rawan
be-nang-o-nam honge kahin aaj-kal pade

insan to he wahi jo badal de hawa ka rukh
insan wo kya jo sath hawaon ke chal pade

sahwan jo hum se zikr-e-wafa ho gaya kabhi
un ki jabin-e-naz pe kya kya na bal pade

ye bankpan ye husn ye masti bhari ada
khud tu bhi dekh le to tera dil machal pade

apna kaha tha hans ke mujhe us ne ek bar
ab din ko chain aae na shab hi ko kal pade

dil hai wahi jo rakhta ho tab-e-jamal-e-tur
wo kya jo ek jugnu ki lau par machal pade

tadpa tha jis khushi ke liye 'sehr' umr bhar
jab wo khushi mili mere aansu nikal pade