tere naz uthane ko ji chahta hai
muqaddar banane ko ji chahta hai

fughan lab pe lane ko ji chahta hai
qayamat uthane ko ji chahta hai

nahin mar ke bhi bhulna jin ko mumkin
unhen bhul jaane ko ji chahta hai

tumhein dekh kar aaj jaan-e-tamanna
mohabbat jatane ko ji chahta hai

wo gham jis ki lazzat hai malum dil ko
wo gham phir uthane ko ji chahta hai

zara bijliyon ko to aawaz dena
nasheman banane ko ji chahta hai

ye dil aazmaish mein thahre na thahre
magar aazmane ko ji chahta hai

bahaaren kahan ras aaengi mujh ko
khizan ko manane ko ji chahta hai

gham-e-taza ki hai ye tamhid shayad
mera muskurane ko ji chahta hai

ghadi bhar yun hi ruth jao khudara
tumhein phir manane ko ji chahta hai

tumhaari in aankhon ki gahraiyon mein
mera dub jaane ko ji chahta hai

nazar ka ye parda jo hail hai ab tak
use 'sehr' uthane ko ji chahta hai