khwab dekha hai na aankhon mein junun dekha hai
meri wahshat ne faqat haal-e-zabun dekha hai

tum ne dekhi hi nahin ganw ki pur-shor faza
tum ne bas shahr ki galiyon ka sukun dekha hai

ye bata aankh mein hairat utar aai kaise
ye na samjha ki mujhe pyar se kyon dekha hai

jaise mahtab ulajhta hai rawan lahron se
main ne jate hue talab ko yun dekha hai

dar-e-aflak to us waqt khula hai mujh par
niyat-e-ijz se jab apne darun dekha hai

ho gaya naqsh-ba-diwar wahi shakhs 'suhaib'
us ki aawaz ka jis ne bhi fusun dekha hai