khwab mein ya khayal mein mujhe mil
tu kabhi khadd-o-khal mein mujhe mil

mere dil ki dhamal mein mujhe dekh
mere sur meri tal mein mujhe mil

meri mitti ko aankh di hai to phir
kisi mauj-e-visal mein mujhe mil

mujhe kyun arsa-e-hayat diya
ab inhen mah-o-sal mein mujhe mil

kisi subh-e-firaq mein mujhe chhod
kisi sham malal mein mujhe mil

tu khud apni misal hai wo to hai
isi apni misal mein mujhe mil

tere shayan-e-shan hai wasf yahi
kisi waqt-e-muhaal mein mujhe mil

mere kal ka pata nahin meri jaan
tu abhi mere haal mein mujhe mil

mujhe mil kar uruj de ya na de
mere waqt-e-zawal mein mujhe mil