khwab palkon pe meri aa ke machal jate hain
ya kabhi ban ke guhar aankh se dhal jate hain

mujh ko gosha koi manus sa jo lagta hai
log diwar pe taswir badal jate hain

kal wo aalam tha ki ek jaan thi do qalib the
aaj ye hai ki wo katra ke nikal jate hain

hum ko tufan-e-hawadis ka koi khauf nahin
ye jo aate hain to kuchh hum bhi bahal jate hain

apne aangan mein wo suraj ke tamannai hain
jo diya dekh ke hamsae ka jal jate hain

main sukhnawar bhi nahin fan ka saliqa bhi nahin
zakhm hain dil ke jo naghmat mein dhal jate hain