khwab zakhmon ki tarah mir ki ghazlon jaisa
mujh ko ek shakhs mila hai meri sochon jaisa

jis ki baaton mein ho ambar ki araq-afshani
jis ka andaz hamesha ho gulabon jaisa

yun laga jaise use jaanti hun sadiyon se
main ne ek shakhs ko paya mere khwabon jaisa

baat karta tha magar baat badal jata tha
us ka lahja tha kai uljhe sawalon jaisa

subh ki kirnon ke jaisi hai mohabbat us ki
us ka andaz-e-mohabbat hai ujalon jaisa

jaane wale ko khabar kya ki bichhad kar us se
lamha sadiyon mein guzarta hai azabon jaisa

zindagi apni jo kahta tha hamesha mujh ko
ab mera zikr wo karta hai hawalon jaisa