khwar-o-ruswa the yahan ahl-e-sukhan pahle bhi
aisa hi kuchh tha zamane ka chalan pahle bhi

muddaton baad tujhe dekh ke yaad aata hai
main ne sikha tha lahu rone ka fan pahle bhi

dil-nawaz aaj bhi hai nim-nigahi teri
dil-shikan tha tera be-sakhta-pan pahle bhi

aaj is tarah mila tu ki lahu jag utha
yun to aati rahi khushbu-e-badan pahle bhi

'shaz' wo jaanega un aankhon mein kya kya kuchh hai
jis ne dekhi ho un aankhon ki thakan pahle bhi