kin ujlaton se apni jawani guzar gai
aandhi si ek uthi idhar aai udhar gai

duniya ke hadson ne bigade hazar kaam
itna hua ki apni tabiat sanwar gai

be-wajh ye sukun mayassar nahin mujhe
tum aa gae to gardish-e-dauran thahar gai

hota hai maslahat ki bina par har inqalab
aai sahar jo bazm se sham-e-sahar gai

paya jise rafiq-e-amal har gunah mein
hairan hun main ki ab wo jawani kidhar gai

hun khami-e-mazaq-e-tamanna se sharmsar
aaya nazar na kuchh bhi jahan tak nazar gai

pabandi-e-quyud-e-mohabbat ke bawajud
sau bar tujh ko dhundne meri nazar gai

ai gardish-e-mudam sanbhalne bhi de mujhe
ab to kisi ki yaad bhi dil se utar gai

'sahir' ye qaul hazrat-e-ghaalib ka hai baja
ab aabru-e-shewa-e-ahl-e-nazar gai