kis barte par armanon ki basti phailai jati hai
phaili hui duniya kya jaanen kis din mangwai jati hai

jo khun-e-jigar mein aata hai bah jata hai wo aankhon se
hum roz kamae jate hain aur roz kamai jati hai

bardasht ki had se bahar hai har-chand musibat ulfat ki
hum is ko uthae jate hain jab tak ye uthai jati hai

aashiq ki tabiat khel nahin phatkar hai kya gham-khwaron par
kis ko bahlae jate hain ye kya bahlai jati hai

kya baad-e-fana 'khushtar' hai rakha matam to jite ji ka tha
ab hum uthwae jate hain ab saf uthwai jati hai