kis darja mere shahar ki dilkash hai faza bhi
manus har ek chiz hai mitti bhi hawa bhi

dekho to har ek rang se milta hai mera rang
socho to har ek baat hai auron se juda bhi

yun to mere haalat se waqif hai zamana
lekin mujhe milta nahin kuchh apna pata bhi

sae ki tarah sath raha karta hai ek shakhs
saya ki hua karta hai apnon se juda bhi

phir zakhm-e-tamanna ke nae phul khile hain
khushbu teri le aai hai phir mauj-e-saba bhi

har aan badalti hui duniya hai ye 'nadir'
yan dil ke lagane ki nahin hai koi ja bhi