kis ehtiyat se hum raushni mein dub gae
khuli jo aankh to phir tirgi mein dub gae

ajib taur se ras aaya umr ka dariya
isi se par lage the usi mein dub gae

wo jahilana takallum pe sarfaraaz hua
hum apne lahje ki shaistagi mein dub gae

badalna hoga ab andaz apne rone ka
tamam bachche achanak hansi mein dub gae

ajib chiz thi rangini-e-fareb-e-bahaar
jidhar nigah uthi sadgi mein dub gae

samajh mein aaya na un ko shanawari ka mizaj
samundaron se nikal kar nadi mein dub gae

wo jin ke dam se ujalon ka tha bharam ai 'shan'
ghazab hua ki wahi tirgi mein dub gae