kis ja na be-qarari se main khasta-tan gaya
par dekhne ka us ke kahin dhab na ban gaya

kis kis tarah ki ki khafagi dil ne mujh se aah
rutha kisi ka yar kisi se jo man gaya

yaro jahan mein ab kahin dekhi wafa ki chaal
jaane do ye na zikr karo wo chalan gaya

sausan zaban nikale jo nikli to zer-e-khak
kya jaaniye ki kaun ye tishna-dahan gaya

ai ishq sach to ye hai ki shirin ne kuchh na ki
hasrat ka koh dil pe liye kohkan gaya

bas naseha ye tir-e-malamat kahan talak
baaton se teri aah kaleja to chhan gaya

kal us sanam ke kuche se nikla jo shaikh-e-waqt
kahte the sab idhar se ajab barhaman gaya

paida ye hijr-e-yar mein wahshat hui ki aah
is dil ka wasl mein bhi na diwana-pan gaya

hairan hai tujh ko dekh ke 'jurat' meri to aql
do chaar din mein kya ye tera haal ban gaya