kis liye gosha-e-akhbar ye khali jae
ek khabar apni hi shohrat ki bana li jae

kuchh to aankhon ko nazar aae jahan-e-digar
kuchh to ab raushni-e-shauq badha li jae

dekhen ahbab pe kya radd-e-amal hota hai
apne mar jaane ki afwah uda li jae

hum faqiron ke liye hath ka apna takiya
chadar-e-khak kahin par bhi bichha li jae

daulat-e-ishq se mamur hai takiya mera
'ziya' ahbab ko ye baat bata li jae