kis nam-e-mubarak ne maza munh ko diya hai
kyun lab pe mere zamzama-e-sall-e-ala hai

kis dar ki gadai meri qismat mein hai ya rab
sar par jo mere saya-fagan baal-e-huma hai

sine mein mere dagh-e-gham-e-ishq-e-nabi hai
ek gauhar-e-nayab mere hath laga hai

sargarm hai dil shafa-e-mahshar ki talab mein
kafir hun agar kuchh bhi gham-e-roz-e-jaza hai

gustakh teri madh-sarai mein hai 'wahshat'
kyunkar na ho tere hi to kuche ka gada hai