kis qadar dushwar tha ye masala hal kar diya
ek sargoshi mein us ne mujh ko pagal kar diya

jaane ye tasir hathon mein kahan se aa gai
itifaqan us ko chhu kar main ne sandal kar diya

jin ki jumbish par kabhi tha waqt ka dar-o-madar
waqt ne dhundla unhin aankhon ka kajal kar diya

qaede qanun sare rakh diye baala-e-taq
hum ne is duniya ko insanon ka jangal kar diya

dur kar paya na jab tarikiyan koi 'sharar'
aakhirash apne qalam ko main nai mashal kar diya