kisi be-ghar jahan ka raaz hona chahiye tha
hamein is dasht mein parwaz hona chahiye tha

hamare khun mein bhi koi bichhdi lahar aai
hawa ke hath mein ek saz hona chahiye tha

hamare la-makan chehre mein aainon ke jangal
hamein in mein tera andaz hona chahiye tha

yahin par khatm honi chahiye thi ek duniya
yahin se baat ka aaghaz hona chahiye tha

'riyaz' ab tum ko khulna chahiye tha is waraq par
kisi be-ghar jahan ka raaz hona chahiye tha