kisi charagh ki surat kisi dua ki tarah
hamein aziz hai wo harf-e-muddaa ki tarah

milen to kaise milen us se hum charagh-numa
jo zo'm sar mein rakkhe sar-phiri hawa ki tarah

kuchh aise log jinhen bolne ka shauq raha
pade hain ghar mein wo ab ek be-sada ki tarah

koi to ho jo mere habs se nikale mujhe
koi to ho jo mujhe bhi lage saba ki tarah

khuda hai ek ye 'iqrar' hai so ai duniya
khuda ko hum nahin kahte kisi khuda ki tarah