kisi dil mein mere liye pyar kyun ho
ye isar hai aur isar kyun ho

tabahi ho jab aarzu ka muqaddar
to dil is tabahi se hushiyar kyun ho

ye khuddar hona hi laya kharabi
mohabbat mein insan khuddar kyun ho

koi apne hi gham se khali kahan hai
jahan mein koi mera gham-khwar kyun ho

na pahla sa milna na aana na jaana
ab itne bhi tum mujh se bezar kyun ho

isi kashmakash ne duboya jahan ko
unhen jit kyun ho mujhe haar kyun ho

jafa par nahin jab wo dil hi mein nadim
nazar se nadamat ka izhaar kyun ho

agar bakhsh dene pe tayyar ho tum
mujhe jurm se apne inkar kyun ho