kisi ka aks-e-badan tha na wo sharara tha
to main ne khema-e-shab se kise pukara tha

kahan kisi ko thi fursat fuzul baaton ki
tamam raat wahan zikr bas tumhaara tha

makan mein kya koi wahshi hawa dar aai thi
tamam pairahan-e-khwab para para tha

usi ko bar-e-digar dekhna nahin tha mujhe
main laut aaya ki manzar wahi dobara tha

subuk-sari ne girani ajib ki dil par
hai ab ye bojh ki wo bojh kyun utara tha

shab-e-siyah safar ye bhi raegan to nahin
wo kya hua jo mere sath ek sitara tha