kisi ka jism hua jaan-o-dil kisi ke hue
hazar tukde meri ek zindagi ke hue

badal saka na koi apni qismaton ka nizam
jo tu ne chaha wahi haal zindagi ke hue

jo sare shahr ke patthar liye tha daman mein
tamam shishe taraf-dar bas usi ke hue

badalte waqt ne taqsim kar diya mujh ko
the mere khwab jo tere wahi kisi ke hue

tamam umr rahi hai mukhalifat jis se
'rais' hum bhi taraf-dar phir usi ke hue