kisi ke bhul jaane se mohabbat kam nahin hoti
mohabbat gham to deti hai sharik-e-gham nahin hoti

buton se koi ye kah de na wo jame se bahar hon
nazakat chahne walon ki bhi kuchh kam nahin hoti

buton ko husn bakhsha aur ye jaur-o-sitam hum par
magar is se to mahfil ishq ki barham nahin hoti

wo aashiq hi nahin goya bhula baithe jo dilbar ko
mohabbat chahti hai waqt ye ek dam nahin hoti

tasalli chahta hai to khushamad kar hasinon ki
dawa is aag lagne ki jahan mein 'gham' nahin hoti