kisi ke ru-e-gham-zada pe jab kabhi nazar gai
ye mera dil tadap utha ya meri aankh bhar gai

hamari umr-e-rafta kya malul kya shagufta kya
bhali thi ya buri thi jo guzar gai guzar gai

wafa ke ek mod par gaya tha koi chhod kar
hayat jaise bas usi maqam par thahar gai

kamal khadd-o-khal the siyah khamida baal the
wo tamkanat ai sahib-e-jamal ab kidhar gai

jo rah-rau hain kam-nazar safar bhi un ka kya safar
wahi hai un ki had jahan tak un ki rahguzar gai

bala ki sakht jaan thi zamin pe aasman thi
wahi ye qaum hai adu ki sarzanish se mar gai

ujad gaya tha gulsitan ba-dast-e-mausam-e-khizan
so phir bahaar aa gai kali kali sanwar gai