kisi ki aankh mein rahta kisi ke dil mein rah jata
ghubar-e-gham-zada uthta to is mushkil mein rah jata

liya hai gahe-gahe naqsh-e-pa-e-yar ka bosa
na wo bahar nikalta ye bhi arman dil mein rah jata

sabab se na-tawani ke na pahuncha ku-e-jaanan tak
jo main ghar se nikalta pahli hi manzil mein rah jata

zamana hath phailata hamiyyat tark kar deta
adam ki rah mein gar kuchh kaf-e-sail mein rah jata

hamesha main khadang-e-naz ko rakhta hun sine mein
mere dil se nikalta dusre ke dil mein rah jata

hamare khun-e-nahaq ki shahadat hashr mein deta
agar dhabba lahu ka khanjar-e-qatil mein rah jata

suna hai baad mere aqraba ki ghair haalat thi
na meri maut aati main bhi is mushkil mein rah jata

meri dariya-e-gham mein maut aa jati to ye hota
bas ek tufan uth kar daman-e-sahil mein rah jata

yaqin hai yun tadapta sare aalam ko khabar hoti
agar dam nam ko baqi tere ghayal mein rah jata

mila hai khak mein majnun suwarat sari mehnat thi
koi zarra jo ud kar gosha-e-mahmil mein rah jata

lagaya hath pura aur kaha jallad ne hans kar
ye kyon arman ek baqi dil-e-bismil mein rah jata

gaya main us ki sohbat mein khushi se maut aa jati
bahut achchha tha mera zikr us mahfil mein rah jata

yaqin hai baad mere phir kisi ka imtihan hota
jo koi zulm baqi aasman ke dil mein rah jata

ghash aaya us ko aisa hashr karta sare aalam mein
jo kuchh bhi hosh baqi aap ke ghafil mein rah jata

ayaadat ko tere ahbab gar kuchh bhi na aa pae
'shafiq' is baat ka arman tere dil mein rah jata