kisi ko phir use pane ki zid hai
hamare darmiyan aane ki zid hai

meri chahat hai us ko rok lena
magar wo hai ki bas jaane ki zid hai

dayar-e-sham se aage nikal kar
mohabbat ke aza-khane ki zid hai

shuur-e-gham wahan pahuncha ki ab to
khushi ko marsiya-khane ki zid hai

kisi ki pyas zinda jawedan hai
kisi ko phir se mar jaane ki zid hai

furaat-e-jism se khemen hata kar
amir-e-sham ke aane ki zid hai