kisi nazar mein samaun wo walwala bhi de
nikhaar bakhsha hai tu ne to aaina bhi de

tamam lafz hi khamosh maslahat ke shikar
zaban di hai to kahne ka hausla bhi de

guman-o-waham ke mabain thak ke baith gaya
kahan talash karun kuchh ata-pata bhi de

nafas nafas ki aziyyat se baat kya banti
mere aziz mujhe zakhm-e-jaan-faza bhi de

charagh aise andheron mein sath den kab tak
safar hi shart agar hai to rasta bhi de

mera khulus tere makr-o-fan se haar gaya
kahan azab-e-mukarrar mujhe hata bhi de