kisi qatil se na talwar se dar lagta hai
aaj kya baat hai darbar se dar lagta hai

khud ko odhe hue baitha hun kisi goshe mein
har taraf shorish-e-bisyar se dar lagta hai

sochta hun ki kahan tek laga kar baithun
mujh ko khud apni hi diwar se dar lagta hai

tut jae na kisi aan tasalsul us ka
kyun mujhe sans ki takrar se dar lagta hai

main ne qatil ka ada rol kiya hai 'hamdam'
kyun mujhe apne hi kirdar se dar lagta hai