kisi suragh se kamre mein nur utrega
zarur andheron ka ek din ghurur utrega

khafa hai mujh se to us ko khafa hi rahne do
milunga us se to ghussa zarur utrega

pata chalega tabhi kya ganwa diya tum ne
tumhaare sar se jab us ka fitur utrega

bas intizar mein rah jaegi wo shahzadi
udan-khatola kahin ja ke dur utrega

chamak uthega ye pani bhi chandni ki tarah
ye chand dariya mein jab chur-chur utrega

kiye pe apne tu pachhtaega ba-har-surat
khara kasauti pe jab be-qusur utrega